بعد ما شفنا المساعدة الكهربائية الخفيفة في المنشور اللي فات، اليوم نطلعو لمستوى آخر..
اليوم نحكيو على النظام اللي دار ثورة وخلى العالم كامل يعرف واش معناها “هايبرد”.
اليوم نحكيو على الهجين الكامل (HEV).
واش هو الهجين الكامل باختصار؟
هو سيارة عندها “قلبين”: محرك وقود عادي، ومحرك كهربائي قوي (أو زوج)، مع بطارية متوسطة الحجم. الفرق الكبير بينو وبين الهجين الخفيف هو أنو هنا المحرك الكهربائي قادر يمشي السيارة وحدو لمسافات قصيرة وبسرعات معقولة، بلا ما يتدخل محرك الوقود. يعني تقدر تمشي في الزحمة أو تخرج من الڨاراج “ساكت” وكأنك في سيارة كهربائية 100%.
كيفاش يخدم هذا النظام بذكاء؟
السر هنا هو “التعاون”. كمبيوتر السيارة يقرر وحدو شكون يخدم و وقتاش:
عند الانطلاق أو السرعة المنخفضة: السيارة تمشي كهرباء فقط. هدوء تام واقتصاد كبير.
عند التسارع أو السرعة العالية: محرك الوقود ينوض ويعاون، وهنا الزوج محركات يخدمو مع بعض باش يعطوك أقصى قوة.
عند التباطؤ أو الفرملة: النظام يخدم كـ “مولد” ويسترجع الطاقة الضائعة باش يشحن البطارية.
الشحن: أهم حاجة لازم تعرفها: ما تحتاجش تشحنها من الحيط!. السيارة تشحن روحها بروحها من المحرك ومن الفرملة.
علاش هذا النظام محبوب وناجح بزاف؟
اقتصاد حقيقي: يوفر الوقود بنسبة كبيرة (30% إلى 50% مقارنة بالسيارة العادية)، خاصة في المدينة وين الاستهلاك يكون عالي عادة.
راحة البال: ما تخممش في الشحن، ما تخممش في المدى. عمر بنزين وسوق وين حبيت.
الهدوء: في الزحمة والسرعات البطيئة، السيارة تكون صامتة ومريحة جداً.
الصيانة: الفرامل تتآكل أقل (بسبب الكبح التجديدي)، والمحرك يرتاح أكثر.
واش هي العيوب تاعو؟
صندوق أمتعة أصغر: غالباً البطارية تاخذ مكان في الصندوق الخلفي وتنقص من مساحة التحميل.
التعقيد: عندك زوج محركات، بطارية كبيرة، ونظام تحكم معقد. الصيانة إذا فسدت حاجة كبيرة تقدر تكون غالية.
الصوت: ساعات كي ينوض محرك البنزين فجأة وأنت تمشي، يدير صوت عالي شوية (خاصة مع علب السرعات CVT).
لمن تصلح هاذ السيارة؟
تصلح لأي واحد يسوق بزاف في المدينة والزحمة (هنا وين توفر كثر)، ويحب يقتصد في جيبو وفي نفس الوقت “يحافظ على البيئة”، بلا ما يبدل روتين حياتو وبلا ما يكسر راسو بكوابل الشحن. يعني النظام هذا هو الحل “الوسطي” المثالي.
الخلاصة:
الهجين الكامل هو سيد الحلول العملية. عطانا طعم الكهرباء بلا مشاكل الشحن. بصح واش لوكان نحبو نمشيو مسافة أطول بالكهرباء؟ واش لوكان نحبو نشحنوها في الدار باش ما نستهلكوش وقود قاع في المشاوير القصيرة؟ هنا نحتاجو الهجين القابل للشحن (PHEV)، وهذا هو موضوع منشورنا الجاي.
اذا وصلت لهذا السطر شكرا لك
