اليوم انسى المنعرجات، انسى التحكم الدقيق… هنا، كاين
قانون واحد برك: شكون يوصل لخط النهاية هو اللول
أهلاً بكم في عالم سباقات السحب او Drag racing، رياضة القوة الخالصة، العضلات والتسارع اللي يحبس القلب!
واش هو الدراغ ريسينغ؟
هو سباق تسارع مباشر بين زوج سيارات (أو أكثر) في خط مستقيم لمسافة قصيرة ومحددة
أشهر مسافة هي ربع الميل (Quarter Mile)، اللي هي حوالي 402 متر. الفائز هو اللي يقطع هاذي المسافة في أقل وقت ممكن ويوصل بأعلى سرعة. هنا، كل جزء من الثانية مهم، والانطلاقة هي كلش
منين جات الفكرة؟
الفكرة بدات في أمريكا في الثلاثينات والأربعينات، في البحيرات الملحية الجافة في كاليفورنيا كيما “موروك دراي ليك”. الهواة كانوا يتجمعو تماك بسياراتهم المعدلة (Hot Rods) باش يختابرو شكون عندو أسرع سيارة في خط مستقيم. مع الوقت، ولات هاذي السباقات منظمة، وانتقلت من الطرقات العامة والمطارات المهجورة لحلبات سباق خاصة (Drag Strips) بقوانين وأنظمة أمان، وولّات رياضة عالمية عندها جمهورها الكبير
واش هي السيارات المناسبة للدراغ ريسينغ؟
تقدر تحول أي سيارة لسيارة دراغ، بصح كاين سيارات تصلح خير من غيرها. سيارات الدفع الخلفي (RWD) هي الأفضل لأنو عند الانطلاق، وزن السيارة يتحول للخلف ويزيد من تماسك العجلات الخلفية. سيارات العضلات الأمريكية كيما موستانغ، كمارو، وتشالنجر هي ملكة هاد الرياضة. السيارات اليابانية الأسطورية كيما تويوتا سوبرا، نيسان GT-R (بدفعها الرباعي الذكي) ثاني عندها مكانة كبيرة. وحتى السيارات الأوروبية تقدر تكون وحوش في الدراغ
أهم التعديلات او كيفاش تبني وحش دراغ
المحرك وعلبة السرعات: هنا ماكانش لعب. الهدف هو أقصى قوة ممكنة! يستعملو كل الوسائل: محركات V8 ضخمة، شواحن توربو بحجم رأس إنسان، سوبرتشارجر يصفر بقوة، وبالتأكيد، النيتروز (Nitrous) باش يعطي دفعة جنونية. علبة السرعات لازم تكون قوية بزاف باش تتحمل هاد القوة، وتكون معدلة باش تبدل السرعات في أجزاء من الثانية
الإطارات والعجلات: هادي نقطة حاسمة. في الخلف، يستعملو إطارات خاصة بالدراغ (Drag Slicks) تكون عريضة بزاف وملساء تماماً، ومصنوعة من مطاط طري بزاف باش يلصق في الطريق كي شغل علكة. وفي الأمام، يستعملو إطارات رقيقة وخفيفة (Skinnies) باش ينقصو من الاحتكاك والوزن
نظام التعليق: لازم يكون معدل خصيصاً للدراغ. نظام التعليق الخلفي لازم يكون طري شوية باش يسمح للجزء الخلفي تاع السيارة “يهبط” عند الانطلاق ويزيد الضغط على العجلات الخلفية. أما الأمامي، فيكون مرتفع شوية
الهيكل والوزن: تخفيف الوزن لأقصى درجة ممكنة. ينحو كل شي ماشي ضروري. في المستويات العالية، يستعملو هياكل أنبوبية خفيفة (Tube Chassis). وساعات يزيدو “ويلي بار” (Wheelie Bar)، اللي هي زوج قضبان حديد في مؤخرة السيارة، باش تمنعها من أنها تتقلب للخلف من قوة الانطلاق
نظام الدفع: الديفرنشيل الخلفي لازم يكون قوي بزاف ومقفل (Locked Diff or Spool) باش يضمن أنو القوة تروح للعجلتين الخلفيتين بالتساوي وبدون أي ضياع
مستوى التكلفة
الدراغ ريسينغ يقدر يبدا بمستوى بسيط (سيارة عادية بإطارات سيمي-سليك وتعديلات خفيفة على المحرك)، بصح يقدر يوصل لمستوى احترافي بلا حدود. بناء سيارة دراغ قادرة تنافس في المستويات العليا يقدر يكلف مئات الآلاف أو حتى ملايين الدولارات
الخلاصة
الدراغ ريسينغ هو العلم تاع كيفاش تحول كل قطرة بنزين لأقصى تسارع ممكن في خط مستقيم. هو سباق ضد الوقت وضد قوانين الفيزياء
واذا وصلت لهذا السطر شكرا لك
