إذا كان الدفع الخلفي هو خيار “القلب والمتعة”، فالدفع الأمامي هو خيار “العقل والجيب”. في السبعينات والثمانينات، صرات ثورة في عالم السيارات، وفجأة، أغلب الشركات ولات تصنع سيارات تجبد من القدام. علاش صرا هاد التحول الجذري؟ وعلاش ولا هو المعيار العالمي للسيارات العادية؟
علاش الدفع الأمامي هو الحل الاقتصادي والعملي؟
المهندسين لقاو فكرة عبقرية: نحطو المحرك، علبة السرعات، ونظام الدفع، كامل فوق العجلات الأمامية.
النتيجة؟
مساحة أكبر: تخلصنا من عمود الدوران الطويل اللي كان يقسم السيارة، وولى عندنا أرضية مسطحة وواسعة للركاب وللصندوق الخلفي.
وزن أخف: قطع أقل يعني وزن أقل، وهذا يعني استهلاك وقود أقل.
تكلفة أقل: تصنيعه أرخص واسهل، وهذا خلى السيارات في متناول الجميع.
واش هي الميزة تاعو في الشتا والثلج؟
هنا وين الدفع الأمامي يغلب الخلفي بالنسبة للسائق العادي. بما أنو وزن المحرك (اللي هو أثقل حاجة في السيارة) جاي مباشرة فوق العجلات اللي تجبد، هذا يعطيهم “ثقل” وتماسك أفضل باش يغرسو في الثلج ويجبدو السيارة، عكس الخلفي اللي يكون خفيف ويزلق بسهولة. وهو نظام أسهل للتحكم في الظروف الصعبة.
بصح واش هو العيب اللي يكرهوه المحترفين؟
الكلمة هي: نقص التوجيه (Understeer).
بما أن العجلات الأمامية مسكينة راهي دير كلش (تجبد وتوجه وتفرمل)، كي تضغط عليها بزاف في منعرج، تتعب وتفقد التماسك. النتيجة؟ نتا تدور المقود، بصح السيارة تكمل تمشي “طول” وتخرج من المنعرج. هذا الشعور يعتبر “آمن” للسائق العادي (لأن رد الفعل الطبيعي هو تنحي رجلك فتعاود تحكم)، بصح يعتبر “ممل” وغير رياضي لعشاق السياقة اللي هوما حالة خاصة.
ملاحظة خفيفة: لغويا من الأصح قول سحب أمامي ولا جر أمامي لكن المنتشر بين الناس دفع أمامي لهذا وجب ذكرها كتوضيح للناس اللي تحب تدقق هههه
والخلاصة:
الدفع الأمامي هو البطل الصامت. هو اللي خلى السيارات واسعة، رخيصة، وآمنة للملايين. بصح، إذا كنا نحوسو على التماسك تاع الصح؟ إذا حبينا نمشيو في الثلج الغارق ولا الرمل وين الأمامي والخلفي يحصلو في زوج؟ هنا لازمنا قوة العجلات الأربعة مع بعض. هنا ندخلو في عالم الوحوش: الدفع الرباعي (4WD/AWD).
اذا وصلت لهذا السطر شكرا لك
