بعد ما حكينا على مقاومة الهوا وعلى مشكل التماسك، اليوم وصلنا لسبب آخر يخلي مهمة برابوس في تحويل القوة الاضافية لأداء صعيبة بزاف… والسبب هاد المرة هو بورش نفسها!
البورش 911 توربو اس هي وحدة من السيارات القليلة فالعالم اللي المهندسين تاعها خدموها باش تكون قريبة بزاف من أقصى حدود الأداء الفيزيائي الممكن على الطريق.. واش معناها هاد الهدرة؟
معناها أن أي زيادة كبيرة في القوة راح تصطدم بظاهرة معروفة في عالم الهندسة يسموها العوائد المتناقصة او (Diminishing Returns)
بدات تصعاب الهدرة !؟؟ ارواحو نبسطوها هههه
كل ما تقرب السيارة من أقصى قدراتها، كل حصان تزيدو يعطيك فايدة أقل بكثير من الحصان اللي كان قبلو. كي شغل تعمر كاس ديجا راه قريب يتعمر، كل قطرة تزيدها راح تفيض أكثر ما تعمر
في سيارة بهاد الكفاءة، تقدر تزيد 100 حصان كاملين وما تشوفش فرق كبير في التسارع ولا في السرعة القصوى، لأنو السيارة أصلاً راهي تخدم في منطقة “التشبع”، وين القوة وحدها ما بقاتش هي العامل اللي يحدد الأداء
بصح هنا يجي السؤال الكبير: إذا كانت بورش ديجا في مرحلة “العوائد المتناقصة”… فواش هي الفايدة الحقيقية من تعديلات برابوس؟ علاش يتعبو رواحهم ويزيدو كامل هاد القوة؟
انتظروا المنشور الجاي باش تعرفو الجواب
واذا وصلت لهذا السطر شكرا لك
