بما انو حكينا على مختلف انواع التعديل خلينا نحكو على مستوى اعلى شوي.. مستوى الشركات
تخيل معايا سيارة Audi A4 ولا Peugeot 308 العائلية اللي تشوفها كل يوم، بصح بهيكل عريض، جناح خلفي ضخم، وصوت يهز الحلبة… وتتسابق وتتضارب مع سيارات أخرى كيما هي في معارك طاحنة على كل منعرج. هاد العالم الشرس والممتع هو عالم سباقات التورينغ (Touring Car Racing).
واش هي سباقات التورينغ؟
هي فئة من سباقات الحلبات تعتمد على سيارات إنتاج عادية (سيدان أو هاتشباك)، يتم تعديلها بشكل مكثف باش تولي سيارات سباق خالصة. الفكرة هي أنها تبان من برا تشبه للسيارة اللي تسوقها، وهاد الشي يخلي الجمهور يتعلق بيها ويشجع الماركة اللي يفضلها. سباقات التورينغ معروفة بالمنافسة القوية والاحتكاك المباشر بين السيارات، شعارهم هو “Rubbing is Racing” (الاحتكاك جزء من السباق).
منين جات الحكاية تاع هاذ السباقات؟
الحكاية بدات في بريطانيا في 1958 مع انطلاق بطولة BTCC (British Touring Car Championship)، اللي مازالت قوية ليومنا هذا. الفكرة كانت بسيطة: سباقات لسيارات السيدان العائلية المعدلة. النجاح تاعها كان كبير بزاف وانتشرت الفكرة في العالم كامل، خاصة في أوروبا وأستراليا. العصر الذهبي تاعها كان في الثمانينات والتسعينات، مع بطولات أسطورية كيما DTM في ألمانيا و Super Tourenwagen Cup، وين كانت المنافسة بين BMW، مرسيدس، أودي، وألفا روميو توصل للذروة تاعها.
واش هي السيارات المناسبة لسباقات التورينغ ؟
عادةً تكون سيارات سيدان أو هاتشباك متوسطة الحجم. في تاريخ هاد الرياضة، شفنا أساطير كيما BMW M3 (E30)، Mercedes 190E 2.5-16 Evo، Alfa Romeo 155 V6 TI، Audi A4 Quattro، و Ford Sierra Cosworth RS500.
واش هي أهم التعديلات ولا كيفاش تتعدل السيارة العادية بش تولي مخصصة لسباقات التورينغ؟
هنا، السيارة العادية تتجرد من كل شي وتتعاود تتبنى من جديد كسيارة سباق.
الهيكل والوزن: أول حاجة يديروها هي “الحمية القاسية”. ينحو كل شي من داخل السيارة: الكراسي، العزل الصوتي، التكييف… كل غرام زيادة لازم يتنحى. من بعد، يتم تدعيم الهيكل بالكامل وتركيب قفص حماية (Roll Cage) لحماية السائق.
المحرك وعلبة السرعات: على حساب قوانين كل بطولة، المحركات تكون معدلة بشكل كبير (عادةً 4 أسطوانات توربو في البطولات الحديثة)، وتكون القوة تاعها محددة باش تكون المنافسة عادلة. علبة السرعات تكون متتابعة (Sequential) بست سرعات، مخصصة للسباقات باش يكون التبديل سريع جداً.
نظام التعليق والمكابح: السيارة “تهبط” للأرض لأقصى درجة ممكنة، ويتم تركيب نظام تعليق رياضي قاس جداً مخصص للحلبات (كيما تاع الدريفت بصح بضبط مختلف تماماً). المكابح تكون ضخمة وعالية الأداء باش تقدر توقف السيارة من سرعات عالية في آخر الخط المستقيم.
الديناميكية الهوائية (الايروديناميك): هادي نقطة مهمة بزاف. يزيدو “بودي كيت” (Body Kit) عريض، سبليتر أمامي ضخم، ومشتت هواء خلفي، والأهم هو الجناح الخلفي الكبير اللي يلصق السيارة في الأرض في المنعرجات السريعة.
العجلات والإطارات: يستعملو جنوط خفيفة وقوية (عادةً 18 إنش)، مع إطارات ملساء (Slicks) خاصة بالحلبات باش تمد أقصى تماسك ممكن.
مستوى التكلفة
هنا نحكيو على مستوى احترافي ومكلف جداً. بناء سيارة تورينغ قادرة على المنافسة يكلف مئات الآلاف من الدولارات، لأنو كل قطعة فيها تكون قطعة سباق متخصصة.
الخلاصة
سباقات التورينغ هي الدليل بلي حتى أبسط السيارات العائلية تقدر تتحول لوحش شرس في الحلبة. هي سباقات قريبة من الناس، فيها منافسة حقيقية، وتوريلنا السيارات اللي نشوفوها كل يوم بشكل آخر.
ضرك قولولنا نتوما واش رايكم في فكرة تحويل سيارة سيدان عادية لوحش تاع حلبات؟ وهل كنتو تعرفو سباقات التورينغ من قبل؟
اذا وصلت لهذا السطر شكرا لك
