اليوم نبداو رحلة جديدة مع عملاق ياباني آخر نعرفوه كامل: نيسان (Nissan).
من سيارات السيدان العائلية للسيارات الرياضية اللي تهز الأرض، اسم نيسان معروف في كل بلاصة.
بصح علابالكم بلي الحكاية تاع هاد الشركة ما بداتش باسم “نيسان”؟ الحكاية بدات بكري، بأسماء ورجال آخرين عندهم حلم كبير. ارواحو نكتشفو الجذور الحقيقية تاع هاد الشركة…
الحكاية كامل بدات في عام 1911 مع السيد اللي يظهر على يمين الصورة و اسمو ماسوجيرو هاشيموتو (Masujiro Hashimoto)، أسس ورشة سماها “كايشينشا موتور كار ووركس”. في 1914، هاد الورشة صنعت أول سيارة ليها (الظاهرة ايضا في خلفية الصورة)، وكانت سيارة صغيرة وقوية بالنسبة لوقتها، وعطاوها اسم “DAT”. هاد الاسم ماشي عشوائي، هو الحروف الأولى من أسماء العائلات تاع المستثمرين الثلاثة الكبار اللي دعمو المشروع: كينجيرو دين (Den)، روكورو أوياما (Aoyama)، و ميتارو تاكيوتشي (Takeuchi).
مع الوقت، الشركة كبرت وبدات تخدم شاحنات وسيارات. وفي عام 1931، قررو يصنعو سيارة جديدة صغيرة واقتصادية. في البداية حبو يسموها “ابن دات” أو “Datson” باليابانية. بصح كلمة “son” باليابانية تقدر تعني ثاني “خسارة”، وباش يتفاداو هاد المعنى السلبي، بدلوها بكلمة “sun” اللي ترمز للشمس، اللي هي رمز مهم بزاف في اليابان. وهكذا، تولد اسم داتسون (Datsun) الأسطوري اللي بزاف منا يعرفوه.
في نفس الفترة هاديك، كانت كاين شركة كبيرة أخرى في اليابان اسمها نيهون سانغيو (Nihon Sangyo)، هي مجموعة صناعية ضخمة أسسها رجل الأعمال اللي يظهر على يسار الصورة و اسمو يوشيسوكي أيكاوا (Yoshisuke Aikawa). في بورصة طوكيو، كانوا يختصروا اسم الشركة هادي في زوج كلمات: ني-سان (Ni-San). هاد الشركة بدات تحوس تتوسع في مجال صناعة السيارات.
وهنا تلاقات الحكايات. في عام 1933، مجموعة “ني-سان” شرات الشركة اللي كانت تصنع سيارات داتسون. وبعدها بعام واحد، في 1934، تم تغيير اسم شركة السيارات هادي رسمياً إلى شركة نيسان للسيارات المحدودة (Nissan Motor Co., Ltd.). وهكذا، ورثت الشركة الجديدة تاريخ وخبرة “دات” و “داتسون”، وبدات مغامرة جديدة تحت اسم عالمي جديد نعرفوه كامل اليوم.
هادي كانت مجرد البداية، حكاية كيفاش تولد الاسم برك. في المنشور الجاي إن شاء الله، راح نحكيو على المسيرة تاع شركة نيسان، من أول سياراتها وتحدياتها، حتى وصلت للشي اللي هي عليه اليوم. ابقاو معانا!
اذا وصلت لهذا السطر شكرا لك
