كي نقولو 3000 حصان كهربائي ضد 1600 حصان تاع وقود… شكون يربح؟ المنطق يقول بلي الحكاية باينة، بصح على أرض الواقع السباق بين “حصان الكهرباء” و “حصان الوقود” أعقد بكثير
خلينا ناخذو المثال الحي اللي صرا بين BYD و بوغاتي
راح نلقاو بلي المحركات الكهربائية تاع BYD تقدم عزم دوران فوري وكامل (Instant Torque)، وهاد الشي يخليها تنطلق كالسهم.
يعني فالوقت اللي تكون بوغاتي مازالت “تعمر” فالقوة تاعها وتطلع فالـ RPM، تكون BYD ديجا وصلت لسرعات جنونية
بصح هنا وين تبدا الحكاية تحيّر…
إذا كانت BYD تتفوق بشكل ساحق في التسارع، وتمتلك ضعف القوة الحصانية تقريبًا، كيفاش في التالي، الفرق في السرعة القصوى كان 6 كم/ساعة برك؟
التفسير الأول اللي يجي في البال هو أن بوغاتي عندها ميزة اضافية في هاد السباق: علبة سرعات بـ 7 نسب، والنسب الأخيرة تاعها طويلة ومصممة خصيصاً باش تدفع السيارة لسرعات قصوى جنونية
بينما أغلب السيارات الكهربائية، تعتمد على نسبة تخفيض وحيدة تكون ممتازة في التسارع، بصح ممكن توصل للحد الأقصى تاعها في سرعات معينة
لكن… اللي شاف الفيديو مليح، يلاحظ بلي سيارة BYD كانت في حالة تسارع وكانت قادرة تكمل! يعني هي ما وصلتش للحد الأقصى تاعها
وهكا نفهمو بلي المشكل ماشي في نقص القوة ولا في علبة السرعات، بل في عوائق أخرى حقيقية هي اللي حبستها، كيما الثبات، قدرة تحمل الإطارات، وأنظمة التبريد اللي لازم تمنع البطاريات من الانصهار
وهنا نطرحو السؤال اللي راح يكون هو موضوعنا الجاي:
مادام كاين عوائق أخرى هي اللي تحكم في اللعبة، هل مازالت علبة السرعات المعقدة تاع بوغاتي تعتبر ميزة حقيقية أمام البساطة تاع المحركات الكهربائية؟
تابعونا في المنشور الجاي باش نتعمقو في هاد النقطة الحاسمة بين الكهرباء و الوقود
اذا وصلت لهذا السطر شكرا لك
