الايروديناميكية.. الاحصنة ضد الهواء
بعد ما شفنا البارح أنو الفرق في الأداء كان صغير رغم زيادة القوة الكبيرة، بالاك بزاف فيكم تحيرو. بصح الحقيقة هي أنو كي توصل سيارة لسرعات فوق 320 كلم/ساعة، ولا تسارع تحت 3 ثواني، هنا تدخل في معركة مباشرة مع قوانين الفيزياء. وأكبر عدو ليها في هاد المعركة هو: الهواء
مقاومة الهوا (Air Drag) ما تزيدش بشكل عادي مع السرعة، هي تتضاعف بشكل كبير بزاف. باش نبسطو الفكرة: إذا ضاعفت السرعة تاعك، مقاومة الهوا ما تزيدش للضعف، هي تولي قريب أربع مرات أقوى! وكي توصل لسرعات كيما 300 كلم/ساعة وأكثر، السيارة تولي كي شغل راهي تخترق في حيط تاع هوا. كل زيادة صغيرة في السرعة تتطلب زيادة كبيرة فالقوة
هنا وين يبان الدور الحاسم تاع هندسة الديناميكية الهوائية (Aerodynamics) في الأداء العالي. على هادي برابوس ما خدمتش غير على المحرك، بل عدلت الشكل الخارجي بدقة كبيرة: زادت فتحات تهوية، مشتت هوا خلفي، جناح خلفي، وزوايا جديدة لجسم السيارة. الهدف من هاد الشي ماشي غير باش تنقص مقاومة الهوا، بصح ثاني باش تزيد من القوة الضاغطة للأسفل (Downforce)، وهادي هي اللي تلصق السيارة في الطريق في السرعات العالية وتخليها ثابتة
بلا هاد التعديلات الهندسية، السيارة ما تقدرش تحول القوة الزايدة لأداء حقيقي، وأغلب الطاقة تاع المحرك راح تضيع وهي تعافر مع الهوا، ماشي وهي تتقدم للقدام.
في المنشور الجاي، راح نتعمقو كثر في عامل التماسك (Traction)، ونشرحو علاش حتى الأرض اللي نمشيو عليها تولي عامل مقاوم آخر، رغم وجود إطارات عالية الأداء ونظام دفع متطور.
اذا وصلت لهذا السطر شكرا لك
