والعودة لسلسلتنا وبعد المنشور اللي فات، التفاعل تاعكم كان قوي ماشاء الله والأسئلة كثرت حول أزرار ومصطلحات الدفع الرباعي..
على هادي، قررنا نأجلو التاريخ شوية ونديرو وقفة تقنية باش نشرحو “الكات كات” (4×4) بالتفصيل الممل. اليوم راح تفهم كل وضعية وقتاش تستعملها.
البداية: واش هو الديفرنشيل (Differential) أصلاً؟
قبل ما نحكيو على القفل، لازم نفهمو المبدأ. الديفرنشيل هو “علبة التروس” اللي تجي بين العجلتين (لور أو القدام). الوظيفة تاعو هي السماح للعجلات باش يدورو بسرعات مختلفة (مثلاً في المنعطف، العجلة الخارجية لازم تدور أسرع من الداخلية). بلا بيه، السيارة ما تقدرش تدور باريحية. و حكينا عليه في كتابنا
أوضاع الدفع الرباعي وشرحها:
وضع الدفع الخلفي (2H – 2 High):
هنا السيارة تمشي غير بالعجلات الخلفية. هذا هو الوضع الطبيعي للطريق الناشف والأسفلت. يوفر الوقود ويحمي ميكانيك السيارة.
الدبل الخفيف (4H – 4 High):
هنا تشغل الدفع الرباعي (4 عجلات يجبدو)، بصح بنسبة تروس عادية. وقتاش تخدم بيه؟ في الطرق الزلقة (مطر غزير، ثلج خفيف، بيست). تقدر تمشي بيه بسرعة معقولة.
الدبل الثقيل (4L – 4 Low):
هنا القوة تتضاعف والسرعة تنقص بزاف. السيارة تولي كي الجرار. وقتاش تخدم بيه؟ في الطرق الوعرة (رمل، طين)، أو كي تطلع عقبة واعرة بزاف. هنا تحتاج العزم الأقصى.
الوضع المحايد (N – Neutral):
هنا علبة التوزيع تفصل المحرك على العجلات تماماً. هاد الوضع ما يصلحش للمشي. يستعملوه فقط كي تكون حاب تجر السيارة (Remorquage) و العجلات تدور ولا تستعمل الونش بش تسحب السيارة من حصلة، باش ما تكسرش علبة السرعات.
ضرك واش هو الـ Diff Lock (قفل الديفرنشيل)؟
هو اختصار لـ Differential Lock.
المشكلة: الديفرنشيل العادي (المفتوح) يبعث القوة للعجلة الأسهل (اللي تزلق). يعني لو عجلة تكون في الهوا، هي اللي تدور والأخرى تحبس، وتحصل السيارة.
الحل (القفل): كي تشغل الديفلوك، تلغي عمل الديفرنشيل وتجبر العجلتين يدورو بنفس السرعة 100%. هكذا حتى لو وحدة في الهوا، الأخرى تخرجك.
بالصح علاش يتكسرو “العكوس” (أعمدة النقل)؟
هنا لازم تركزو مليح. قلنا بلي الديفرنشيل يخلي العجلات تدور بسرعات مختلفة في الدورة. كي تشغل الديفلوك (القفل)، راك تمنع هاد الاختلاف.
إذا دورت المقود في طريق ناشف والديفلوك مشغّل، العجلات تحاول تدور بنفس السرعة بصح الأرض تمنعها (الاحتكاك قوي). هاد “الصراع” يولد ضغط هائل على أعمدة النقل (Les cardans / Axles) والتروس، وممكن يكسرهم فوراً. على هادي، الديفلوك ممنوع في الطريق الناشف وخاصة المنعطفات!
ضرك واش هو نظام الزحف (Crawl Control)؟
هذا تكنولوجيا جديدة (كيما في تويوتا لاند كروزر). هو عبارة على “مثبت سرعة” للطرق الوعرة.
نتا تخير السرعة (بطيئة جداً)، والكمبيوتر هو اللي يتكفل بالبنزين والفرامل لكل عجلة وحدها بدقة خيالية باش يخرج السيارة من الغرق أو يطلعها فوق الحجر. نتا مهمتك الوحيدة هي تدور المقود يمين و يسار وتتفرج في السحر…
الخلاصة:
افهم سيارتك: 2H للطريق، 4H للزليق، 4L للقوة، و Diff Lock للإنقاذ فقط.
ضرك، بعد ما فهمنا الأساسيات، راح نشوفو كيفاش هاذيك الشركات.. نقلو تكنولوجيا الدفع الكلي لسيارات السرعة. وهذا هو موضوعنا الجاي.
اذا وصلت لهذا السطر شكرا لك
