غير تبدا القطرات الأولى تاع الشتا تطيح، ولا نشوفو شوية ثلج في الجبال، تبدا معاها واحد الهدرة تدور فالقهاوي ومواقع التواصل..
مول الـ BMW خايف يخرج، مول الدوستر يقولك أنا ملك الطريق، ومول الكات كات (4×4) يحقر فيهم قاع. كل عام نفس الجدال، وكل عام نفس الأسئلة: شكون النظام اللي يسلكك صح؟ وهل الدفع الرباعي هو الحل السحري لكلش؟ لهذا، قررنا ننهو هاذ الجدال و نحطو النقاط على الحروف..
ضرك علاش كل شتا تتخلط الحالة وتكثر الهدرة فهاذ الموضوع؟
المشكل الكبير هو أن المصطلحات كثرت وتخلطت. تسمع RWD، FWD، AWD، 4WD… وزيدلهم الأسماء التجارية اللي تدوخ: Quattro، xDrive، 4Matic، Symmetrical. كل شركة تقولك نظامي هو الأفضل، وكل سائق يحلف بسيارتو. النتيجة؟ ضبابية كبيرة، وناس تشري سيارات “دفع رباعي” وهي تظن أنها دبابة، ومن بعد تحصل في أول طلعة فيها شوية جليد.
واش راح نكتشفو في هاد السلسلة؟
ماراحش نمدولك جواب سطحي تاع “هذا مليح وهذا ماشي مليح”. كيما عادة منشوراتنا راح نديرو رحلة كاملة عبر الزمن والتكنولوجيا. راح نبداو من الأصل، من نهار كانت السيارات كامل بدفع خلفي، ونفهمو علاش رحنا للأمامي، وكيفاش وصلنا للثورة تاع الدفع الكلي. راح نفكو شفرة الأنظمة المعقدة، ونعرفو الفرق الحقيقي بين سيارة تاع صحراء وسيارة تاع رالي، والأهم من هذا كامل… راح نعرفو “العامل الخفي” اللي يخلي سيارة عادية تتفوق على أقوى سيارة دفع رباعي في الثلج.
هل أنت واجد باش تبدل نظرتك للطريق؟
هاد السلسلة موجهة لكل واحد يسوق، سواء عندك سيارة مدينة صغيرة، ولا وحش تاع طرق وعرة. الهدف تاعنا هو أنك كي تكمل هاذ السلسلة تولي تعرف بالضبط واش راه صاري تحت العجلات تاعك، وتعرف تخير واش يوالمك صح، ماشي واش يقولو الناس.
وجدوا رواحكم، اربطوا الأحزمة، وخلينا ننطلقو في رحلة البحث عن “افضل نظام دفع”. البداية راح تكون في المنشور الجاي مع الملك الأصلي، النظام اللي بدا كلش… الدفع الخلفي (RWD).
اما ضرك اذا وصلت لهذا السطر فيها بركة وشكرا لك
