في عالم السيارات، كاين أسماء تحترمها، وكاين أسماء تخافها… بصح كاين اسم واحد برك كي يتذكر، يخلي المنافسين يترعدو.. انه الغودزيلا (Godzilla)!
هذا ماشي اسم فيلم خيالي، هذا هو اللقب اللي عطاتو أستراليا لأسطورة يابانية ولدت باش تلتهم حلبات السباق التهام! اليوم، راح نحكيو على حكاية نيسان سكايلاين GT-R، الوحش اللي غير قوانين اللعبة للأبد.
الحكاية ما بداتش في التسعينات كيما يعتقدو بزاف ناس. لازم نرجعو بالزمن لبعيد، لعام 1969. في هذاك الوقت، نيسان قررت تاخذ سيارة السيدان العائلية تاعها، الـ “سكايلاين”، وديرلها قلب جديد: محرك رياضي جبار مأخوذ من سيارة سباق (Prince R380). النتيجة؟ أول سكايلاين GT-R، معروفة بلقب “هاكوسوكا” (Hakosuka). هادي السيارة البسيطة في شكلها بصح المتوحشة في أدائها، دخلت لسباقات الحلبات في اليابان وفازت بحوالي 50 سباق متتالي! كانت هادي هي البذرة الأولى للأسطورة.
بعد فترة غياب، رجعت نيسان في 1989 ورجعت معاها الكابوس تاع المنافسين: السكايلاين GT-R R32. هادي ماكانتش مجرد سيارة، كانت ثورة تكنولوجية تمشي على أربع عجلات. كان عندها محرك أسطوري، الـ RB26DETT، محرك 2.6 لتر بستة أسطوانات على خط واحد مع زوج شواحن توربو (Twin-Turbo)، ونظام دفع رباعي ذكي ومتطور (ATTESA E-TS) كان سابق وقتو بسنوات. الـ R32 دخلت لبطولة اليابان للسيارات السياحية (JTCC) وفازت بـ 29 سباق من أصل 29 شاركت فيه على مدار أربع سنين! ومن بعد راحت لأستراليا، وين سيطرت لدرجة أنهم اضطرو يغيرو قوانين السباق باش يوقفوها، وهنا وين الإعلام الأسترالي سماها لأول مرة “غودزيلا”.
بعد الـ R32، جات الـ R33 GT-R اللي كانت أكبر وأكثر استقرار على السرعات العالية، وهي أول سيارة إنتاجية تقطع حلبة نوربورغرينغ في أقل من 8 دقائق. ومن بعدها، جات الأيقونة اللي بزاف يعتبروها الأجمل والأكمل..
السكايلاين GT-R R34 في 1999. بتصميمها الشرس، التكنولوجيا المتقدمة، وقابليتها للتعديل اللي ماعندهاش حدود، الـ R34 ولات نجمة في عالم تعديل السيارات وفي أفلام كيما “Fast & Furious”، وثبتت مكانة الـ GT-R كرمز عالمي للأداء.
بعد توقف إنتاج الـ R34، العالم بقى يستنى واش راح دير نيسان. وفي 2007، رجعت نيسان بصح هاد المرة نحات اسم “سكايلاين” وخلات غير الاسم اللي يرعب نيسان GT-R (R35) .
هادي السيارة ماعندها حتى علاقة بالسيارات اللي قبلها، كلشي فيها جديد. بمحرك V6 توين توربو (VR38DETT) يتجمع باليد من طرف خبراء “التاكومي”، وعلبة سرعات مزدوجة القابض، وتسارع من صفر لمئة ينافس أغلى السيارات الخارقة في العالم، الـ R35 واش تحكي عليها و قليل لكن كلش تلخص كي ولات معروفة بلقب “قا*ـلة السيارات الخارقة” (Supercar KiIIer)، لأنها تقدم أداء خرافي بسعر أقل بكثير من منافسيها.
من الـ “هاكوسوكا” البسيطة للـ R35 المتطورة، قصة الـ GT-R هي قصة تاع هيمنة، تحدي، وابتكار. هي الدليل بلي نيسان تقدر تصنع وحش ما يرحمش كي تقرر دير هاد الشي.
و في الاخير اذا وصلت لهذا السطر فشكرا لك
