السلام عليكم يا عشاق العجلات!
في الحلقة السابقة، بنينا العقل والشبكة العصبية (ECU و CAN-Bus). اليوم راح نشوفو أول وأعظم نظام استغل هاد الشبكة باش ينقذ ملايين الأرواح من الموت: الفرامل الذكية. في سلسلة الميكانيك هدرنا على مبدأ عمل الـ ABS الحركي، بصح اليوم راح نكشفو “المخ الإلكتروني” اللي يسيرو، والرفيق السحري تاعه اللي قليل اللي يعرف قيمته: نظام الـ EBD.
1. واش هما هاد النظامين باختصار؟
نظام الـ EBD (خط الدفاع الأول):
اختصار لـ (Electronic Brakeforce Distribution / موزع قوة الفرملة الإلكتروني). هو برنامج ذكي يتدخل مسبقاً في كل فرملة عادية باش ينظم ويوزع ضغط زيت الفرامل بين العجلات ويمنع انزلاقها قبل ما يصرى أصلاً.
نظام الـ ABS (خط الدفاع الثاني):
اختصار لـ (Anti-lock Braking System). هو نظام الطوارئ، ما يتدخلش إلا كي تعجز كل الحلول وتبدأ العجلة بالانغلاق والانزلاق الفعلي (Lock-up)، فيبدأ ينبض بالضغط باش يرجع التحكم في المقود.
2. كيفاش يخدمو مع بعض؟ (عبقرية التوزيع)
الكثير يحسبو بلي الـ ABS والـ EBD يخدمو في نفس اللحظة، بصح الحقيقة أن الـ EBD يسبق دايما:
كي تكون تجري وتفرمل، وزن السيارة يندفع بقوة للأمام بفعل القصور الذاتي (السيارة تغطس بنوفها). هاد الشي يخلي العجلات الأمامية تنضغط بقوة مع الأرض، بينما العجلات الخلفية تخفاف وتولي شبه طايرة في الهواء.
هنا يتدخل الـ EBD أولاً وقبل كل شيء: يقرا سرعة دوران كل عجلة وحمولتها في أجزاء من الألف من الثانية، ويخفض فوراً ضغط الزيت على العجلات الخلفية الخفيفة ويزيده للأمام. هكا يمنع العجلات الخلفية باش تبلوكي وتزحف مؤخرة السيارة (Tête-à-queue).
والأخطر من هذا: في المنعرجات (الفيراجات)، الـ EBD الحديث ما يوزعش غير بين الأمام والخلف برك، بل يوزع حتى بين العجلات اليمنى واليسرى! يفرمل العجلات الداخلية للمنعرج بنسبة تختلف على الخارجية باش يمنع السيارة تدور حول نفسها. إذا فرملت بقوة قصوى وفاتت الحدود وبدأت العجلة تنزلق صح، هنا فقط يسلم الـ EBD المهمة لـ الـ ABS باش يبدأ يضخ النبضات السريعة!
3. باش نفهموها مليح (التشبيه):
تخيل زوج أشخاص رافدين خزانة ثقيلة وهابطين بيها في دروج (سلالم). الشخص اللي جاي لتحت راهو رافد 80% من الثقل كامل، والشخص اللي الفوق راهو رافد 20% برك. الـ EBD هو المشرف الذكي اللي يوزع الجهد مسبقاً: يقول للي لتحت احكم بجهد كبير، ويقول للي الفوق احكم غير بصباعك باش ما تتقلبش الخزانة. أما الـ ABS فهو كي شغل شخص ثالث يتدخل بالخف غير إذا زلقت رجل واحد فيهم باش يمنع الكارثة في آخر ثانية!
4. أول ظهور تاريخي وثقافة عامة:
الحل البدائي القديم (الريبارتيتور الميكانيكي):
قبل اختراع الـ EBD، كيفاش كانو يوزعو الفرامل؟ كان كاين صمام ميكانيكي تحت السيارة مربوط بـ “رسور” (نابض) في المحور الخلفي (الميكانيسيانات في الجزائر يعرفوه باسم: الريبارتيتور / Répartiteur de freinage). كي تعمر الصندوق بحمولة ثقيلة، السيارة تهبط لتحت، الرسور يتكسل ويفتح الصمام ميكانيكيا باش يمرر زيت أكثر للخلف! هاد النظام كان بدائي، يصدأ بالخف، ويتلف ويدير كوارث في التوازن.
أول ظهور للـ ABS الإلكتروني:
كان في الأيقونة الألمانية Mercedes-Benz S-Class (هيكل W116) سنة 1978 بالتعاون مع شركة Bosch.
أول ظهور للـ EBD الذكي:
ظهر في منتصف التسعينات كي تطورت حواسيب السيارات وولات سريعة المعالجة. ومن أوائل السيارات اللي اعتمدته كنظام قياسي حديث كانت Fiat Marea سنة 1996 وبعدها Toyota Prius سنة 1997 لإدارة الفرامل مع المحرك الكهربائي، وهكا تخلص عالم السيارات من مشاكل الرسور الميكانيكي القديم للأبد.
5. علاقتهم باللي جاي في السلسلة والفائدة اليومية:
حماية صفائح الفرامل (Les Plaquettes):
الـ EBD ما يخدمش غير في الخطر برك، بل يخدم في كل فرملة يومية خفيفة عند “الضودان” أو الفروج. بفضله، صفائح الفرامل تستهلك بتوازن بين الأمام والخلف وما تموتش جهة قبل جهة.
التمهيد للـ ESP:
التوزيع الذكي للفرامل بين اليمين واليسار في المنعرجات اللي يديرو الـ EBD هو بالضبط اللبنة الأولى والأساس اللي راح يتبنى عليه نظام الثبات الإلكتروني (ESP) في الحلقات الجاية!
6. إذا صرى خلل واش يصرا؟ (إشارة الطابلوه الخطيرة!)” هنا ركز معايا في لوحة القيادة:
إذا شعل ضوء ABS البرتقالي وحده:
معناه نظام الـ ABS فيه خلل، بصح الـ EBD والفرامل العادية راهم شغالين بنسبة مقبولة.
أما إذا شعل ضوء ABS البرتقالي مع ضوء الفرامل اليدوية الأحمر (!) في نفس الوقت:
هنا الخطر الحقيقي! هذا يعني حصراً تعطل نظام الـ EBD كلياً. السيارة في هاد الحالة تولي خطيرة جداً في السياقة، لأن توازن الضغط بين الأمام والخلف ضاع؛ في أول فرملة متوسطة، العجلات الخلفية راح تبلوكي مباشرة وتزلق بيك مؤخرة السيارة، ومسافة التوقف تزيد بزاف!
هيا نهدرو شوية:
شكون فيكم كسب سيارة قديمة من جيل الثمانينات ولا التسعينات (كيما 504، ماروتي، رونو 21…) وعانى مع هذاك الرسور الميكانيكي تاع الفران اللوراني (الريبارتيتور) كي صدى وما بقاش يفريني؟
اذا وصلت لهذا السطر شكرا لك
