تخيل معايا سيناريو: تخدم ليل ونهار باش تصنع قطع محركات، تديهم لتويوتا باش تبيعهملهم، يرجعوهملك في وجهك ويقولولك خدمتكم ما تصلحش! تروح تقرا وتتعلم وتعاود ترجع وتبيعهملهم بالسيف، ومن بعد تجي الحر*ب العالمية تدمرلك المصنع، ويزيد موراه زلزال يريب كل وش بنيت! في بلاصتو، 99% من الناس يستسلمو… بصح ماشي هاد الراجل. الراجل هذا كان مهووس بالميكانيك لدرجة الجنون، واسمو هو سويتشيرو هوندا (Soichiro Honda).
بدأت الحكاية مع طفل صغير وُلد في 17 نوفمبر 1906 وكان ابن حدّاد، ما كانش يحب القراية والتحصيل الدراسي التقليدي، بصح كان يشوف أي آلة تمشي بعين ساحرة. وفي أبريل 1922 وهو في سن 15 سنة، راح لطوكيو وبدا يخدم كمساعد ميكانيكي في ورشة سيارات مشهورة وقتها اسمها آرت شوكاي (Art Shokai). تماك تعلم كل صغيرة وكبيرة على المحركات والشاسيهات، وحتى شارك في تصليح وتعديل سيارات السباق وساهم في تحقيق فوز تاريخي بها عام 1924.
في أواخر الثلاثينات، أسس شركة صغيرة وبدا يصنع حلقات المكابس (Piston Rings) لشركة تويوتا. الطريق ما كانتش مفروشة بالورود، رفضوه في الأول، بصح الإصرار تاعو خلاه يطور التركيبة الهندسية حتى ولات تويوتا زبون رسمي عندو. لكن، مع نهاية الحر*ب العالمية الثانية، الدمار والزلزال خسرولو كلشي. هوندا باع واش بقالو من المصنع لتويوتا، وقعد يخمم في الخطوة الجاية في بلاد كانت مدمرة كلياً واقتصادها منهار.
في هذيك الفترة، الناس ما كانتش قادرة تشري سيارات ولا حتى بنزين، والنقل العام كان كارثة. هنا بانت عبقرية سويتشيرو: لقى كمية من المحركات الصغيرة الفائضة تاع أجهزة اللاسلكي العسكرية القديمة، وقرر يركبهم على دراجات هوائية عادية، ومن بعد طور الفكرة وبدا يصنع بنفسه محركات ثنائية الأشواط (2-Stroke) صغيرة بسعة 50cc. الاختراع البسيط هذا دار ضجة كبيرة في اليابان، لأنو وفر وسيلة تنقل رخيصة وسريعة للشعب.
في سبتمبر من عام 1948، تأسست رسمياً شركة هوندا موتور (Honda Motor Co.). بصح سويتشيرو كان عبقري ميكانيك وماشي رجل أعمال، والشركة كانت محتاجة عقل اقتصادي باش تكبر. وفي أكتوبر 1949، تلاقى مع شريك حياتو المهنية: تاكيو فوجيساوا (Takeo Fujisawa). الاتفاق بيناتهم كان تاريخي: هوندا يتفرغ 100% للتطوير الهندسي والابتكار، وفوجيساوا يتكفل بالإدارة والتسويق والتمويل.
الشغف الخالص بالهندسة تاع هوندا، مع العقلية الاقتصادية تاع فوجيساوا، هما اللي حطو حجر الأساس لشركة بدات من دراجة هوائية فيها محرك صغير، ووصلت باش تولي أكبر صانع للدراجات النارية في العالم، وعملاق من عمالقة صناعة السيارات.
كيفاش انتقلت هوندا من المحركات لصناعة أول دراجة ليها، وواش هي التحديات المجنونة اللي وقفت في طريقها؟ هذا واش راح نعرفوه في الحلقة الجاية!
اذا وصلت لهذا السطر شكرا لك
