شفتو نظام الهجين المتسلسل (كيما e-Power)، وين المحرك يخدم كمولد للكهرباء؟ ضرك، تخيل أن الشركات قالو: “لالا، هذا ما يكفيش، نحوسو على حاجة أنظف، المولد تاعها يخرج ماء صافي برك من العادم!”.
الفكرة تبان هايلة، بصح هل قدرو صح يحققوها ولا زادو غرقو رواحهم؟
اليوم نحكيو على خلايا الوقود الهيدروجينية (FCEV)
كيفاش تخدم هاد “التكنولوجيا”؟
هي في الحقيقة عبارة عن هجين متسلسل، بصح نحاو محرك البنزين الساهل والموثوق، وحطو في بلاصتو “مفاعل كيميائي” معقد يسموه خلية الوقود.
واش يصرا لداخل؟
يجيبو غاز الهيدروجين المضغوط، ويخلطوه مع الأكسجين في شرائح خاصة، وتصرى عملية كيميائية تولد كهرباء وترمي ماء. وما حبسوش هنا، جربو حتى مواد أخرى كيما الإيثانول والميثانول، في محاولة يائسة باش يلقاو أي سائل “يحرقوه” كيميائياً باش يولد كهرباء بلا ما يستعملو الطرق السهلة المعروفة. شغل راهم يحوسو يعاودو يخترعو العجلة بصح مربعة.
علاش هاد المحاولة تبان يائسة؟
نظرياً، هوما يحوسو يبيعولنا “الحل المثالي”: سيارة تمشي بالكهرباء (عزم وسلاسة)، وتعمرها في 5 دقايق (سرعة). بصح دقيقة… هادي نفس ميزات الهجين المتسلسل اللي شفناه!
الفرق الوحيد هو أن هاذي “أنظف” (تخرج ماء). بصح على جال هاد النقطة تاع “النظافة”، ضحاو بكلش: السعر الرخيص، البساطة الميكانيكية، وسهولة الاستعمال. زادو عقدو الحالة باش يوصلو لنتيجة ديجا كاينة. وعلاش؟ باش يقولو “رانا نحافظو على البيئة”؟
وعلاش دارو مشكل أكبر عوض الحل؟
هنا الكارثة الحقيقية. العالم راهو حاصل باش يوفر شواحن كهربائية كافية، والكهرباء راهي كاينة في كل حيط وفي كل دار! ورغم هذا، البنية التحتية مازالت ناقصة.
فما بالك بالهيدروجين؟ غاز صعيب في النقل، لازم يتخزن بضغط خيالي، ومحطات التعبئة تاعو شبه منعدمة وتكلف الملايير. يعني هوما في بلاصة ما يحلوا مشكل التلوث، خلقوا مشكل لوجستي وهندسي تقريبا مستحيل. راهم يحلمو يبنو شبكة وقود جديدة من الصفر، في وقت العالم راهو ديجا يعاني باش يطور الشبكة الكهربائية السهلة.
الخلاصة:
تكنولوجيا خلايا الوقود هي إنجاز علمي، بصح فشل واقعي ذريع للسيارات الصغيرة. هي مثال حي كي المهندسين يركزو على “واش نقدرو نصنعو” وينساو “واش نحتاجو نستعملو”. حل معقد يخلف مشاكل اكبر 🤷🏻♂️
المهم اذا وصلت لهذا السطر شكرا لك
